Қазығұрт ауданында Қазақстан әуесқой футбол лигасы ұйымдастырған жастар арасындағы Қазақстан Республикасы чемпионатына іріктеу турнирі үлкен тартыспен өтті. Бұл турнир Түркістан облысының әр өңірінен келген жас футболшылардың шеберліктерін байқап, алдағы республикалық доданың жолдамасын ұтып алу мақсатында ұйымдастырылды. Турнирдің қорытындысы бойынша үздік командалар Алматы қаласында өтетін Қазақстан чемпионатында Түркістан облысының намысын қорғайтын болады.
Турнирге облыстың әр өңірінен 18 команда қатысып, олар арасындағы бәсеке өте жоғары деңгейде өтті. Жас футболшылар бұл сайыста шынайы кәсіби ойын көрсетіп, әр матчта нағыз шеберлік пен жеңіске деген жігер танытты. Әр команданың ойыншы-спортшылары бұл турнирде жоғары жауапкершілікпен, көп жылғы дайындық пен қажырлы еңбектің нәтижесінде өнер көрсетті. Ойындардың қарқыны мен қызықтылығы көрермендер мен мамандарды тәнті етті.
Жүлделі орындарға ие болған және республикалық чемпионатқа жолдама алған үздік 3 команда мыналар:
- 1 орын – «Шағыр» (Арыс қаласы)
- 2 орын – «Қазығұрт» (Қазығұрт ауданы)
- 3 орын – «Қарабұлақ» (Сайрам ауданы)
Бұл үш команда 2025 жылы Алматы қаласында өтетін Қазақстан Республикасы чемпионатында Түркістан облысының намысын қорғайтын болады. Бұл жеңіс – тек командалардың ғана емес, тұтас аймақтың футболға деген сүйіспеншілігі мен дамуына қосқан үлесі ретінде үлкен маңызға ие. Турнирдің қорытындысы бойынша жеңіске жеткен командалар өздеріне сенімді түрде республикалық додада жақсы нәтиже көрсетеді деген үміт бар.
Турнирдің ұйымдастырушылары мен қатысушыларының пікірінше, бұл іс-шара тек жас спортшылардың құқықтарын қорғап, олардың болашағына жол аша отырып, болашақ чемпиондарды дұрыс бағытта тәрбиелеуге зор мүмкіндік береді.
