Түркістан облыстық Мақта шаруашылығы тарихы музейінде «Қол өнерін кәсіп еткен тігінші» атты тағылымды кездесу өтті. Іс-шараға Мақтаарал аграрлық колледжінің «Тігін өндірісі және киімдерді үлгілеу»мамандығы бойынша білім алушы студенттері қатысты.Биыл Президентіміз Қасым-Жомарт Тоқаев «Жұмысшы мамандықтар жылы» деп жариялаған болатын. Осыған орай ұйымдастырылған кештің құрметті қонағы – көп жылдық еңбек өтілі бар, қолөнерді кәсіпке айналдырған шебер тігінші Ақмарал апай. Ол өз өмір жолы, тігін өнерінің қыр-сыры және қазіргі жастарға кәсіби бағыт-бағдар беру жайлы ой бөлісті. Студенттермен емен-жарқын сұхбат жүргізіліп, еңбекке деген құлшынысты арттыру, ұлттық қолөнерді сақтап, дамыту туралы маңызды әңгімелер қозғалды.Сексен жылдан астам тарихы бар Мақта шаруашылығы музейі – аймақтың рухани-мәдени мұрасын сақтап келе жатқан бірегей орын. Мұнда 10 мыңнан астам жәдігер сақталған. Музей үш негізгі экспозициялық бөлімнен тұрады – ежелгі дәуірден ХХ ғасырдың 30-40 жылдарына дейінгі кезең, екінші дүниежүзілік соғыс кезеңі, Кеңестік дәуір және Тәуелсіз Қазақстан кезеңі.Аталған іс-шара жастар арасында тігін ісі мен еңбек мамандықтарына қызығушылықты арттыруға, ұлттық қолөнердің қадірін ұғындыруға бағытталған. Осындай тағылымды кездесулер – еліміздің болашағы саналатын жас ұрпақтың кәсіби тұрғыда шыңдалуына үлкен серпін берері сөзсіз.
МАҚТА МУЗЕЙІНДЕ ЖҰМЫСШЫ МАМАНДЫҒЫ ЖЫЛЫНА ОРАЙ КЕЗДЕСУ ӨТТІ
