Елімізде жыл сайын 24 қазанда – Кітапханашылар күні атап өтіледі. Бұл халқымыздың бай мәдени және ғылыми мұрасын сақтау мен жеткізуде аянбай еңбек ететін мамандардың, яғни кітапханашылардың мерекесі. Осы ретте, бүгін атаулы мереке мен Республика күніне орай Түркістан облысы «Төлеби аудандық орталықтандырылған кітапхана жүйесі» коммуналдық мемлекеттік мекемесінде арнайы жиын өтті.
Жиынға «Түркістан облысы кәсіподақтар орталығы» аумақтық кәсіподақтар бірлестігінің төрағасы Бердіғали Өмірәлі, мекеме директоры Светлана Шишкина, кітапхана саласының ардагерлері мен кәсіподақ активі қатысты. Шара барысында кәсіподақ төрағасы Бердіғали Өмірәлі құттықтау сөз сөйлеп, кітапханашы қоғамдағы ең құрметті де қадірлі мамандықтардың бірі екенін айтып өзінің жылы лебізін білдірді.
Сондай-ақ, кітапхана саласының дамуына зор үлес қосқаны үшін мекеме директоры Светлана Шишкинаға «Еңбек даңқы» төсбелгісін табыс етіп, Кәсіподақтар федерациясының Алғыс хатымен Ирина Соболеваны марапаттады. Жиын соңында Бердіғали Өмірәлі кітапхана қорына «Жалындай жарқылдаған ер Жолан» атты кітаптың 36 данасын сыйға тартып, жұмыстарына сәттілік тіледі.
Сонымен бірге, «Түркістан облысы кәсіподақтар орталығы» аумақтық кәсіподақтар бірлестігінің төрағасы Бердіғали Өмірәлі облыс кітапханашыларына кәсіби мерекелеріне орай құттықтау жолдады: «Құрметті кітапханашылар! Сіздерді кәсіби мерекелеріңіз – Кітапханашылар күні мерекесімен шын жүректен құттықтаймын! Бүгінде рухани өміріміздің өзегі іспеттес ғылымды көпшілік оқырманға, ертеңгі ел тізгінін ұстар жас жеткіншек ұрпаққа насихаттауда, рухани мәдени байлығымызды ұрпақтан – ұрпаққа жеткізуші кітапхана болса, сол байлықты өз оқырманына таныстырып, табыстырушы өзіндік тұлға, ол – кітапханашы! Сіздер өздеріңіздің күнделікті еңбектеріңіздің арқасында оқырмандар арасында білімге деген сүйіспеншілікті тәрбиелеп, мәдени дәстүрлерді сақтауға және дамытуға үлес қосып келесіздер. Мереке күні Сіздерге зор денсаулық, ұзақ ғұмыр, отбасыларыңызға амандық, жаңа шығармашылық табыстар мен игі істеріңізге сәттілік тілеймін!» делінген құттықтауда.
