Арыс қаласының әкімі Қайсар Маңқараев кезекті аралау кезінде Орталық базар аумағына барып, мұндағы соңғы өзгерістермен танысты. Өткен жылы тұрғындар тарапынан көтерілген бірқатар мәселелер бойынша тапсырмалар берілген еді. Бүгінде сол жұмыстар кезең-кезеңімен орындалып, нақты нәтижелер көріне бастады.
Әсіресе базар маңындағы бейберекет сауда орындары ретке келтіріліп, «жабайы сауда» аймақтары біршама жүйеленді. Қала басшысы бұл бағыттағы жұмысты одан әрі күшейтуді тапсырды. Сонымен қатар кейбір сауда бутиктерінің орналасуына қатысты заңдылықты қайта қарап, тиісті шаралар қабылдау қажеттігін атап өтті.
Автотұрақ мәселесі де өз шешімін табуда. Базардың күншығыс жағындағы аумақ абаттандырылып, жаңа автотұрақ пайдалануға берілді. Ендігі міндет – қалаішілік такси қызметін ретке келтіру. Осы ретте әкім таксопарк өкілдерімен бірлескен жұмысты жүйелеуді тапсырды.
Аралау барысында саудагерлер мен кәсіпкерлердің ұсыныс-пікірлері де тыңдалып, оларды шешу жолдары қарастырылды. Қала басшысы барлық жұмыстар жоспарға сәйкес, ретімен жүргізіліп, ең бастысы тұрғындар үшін қолайлы жағдай жасалуы қажет екенін атап өтті.
Базар аумағын абаттандыру барысында қоғамдық демалыс орындары мен жаяу жүргіншілер жолдарын кеңейту де қарастырылуда. Бұл қала тұрғындары мен келушілер үшін жайлы орта қалыптастыруға мүмкіндік береді.
Сонымен қатар, бақылау қызметтері базар аумағындағы тазалық пен қауіпсіздікті тұрақты қадағалап отыруға бағытталған жаңа кесте бойынша жұмыс істейді. Бұл тұрғындар мен кәсіпкерлердің сенімін арттырады. Болашақта базар аумағында саудагерлердің құқықтары мен міндеттерін нақтылау, сонымен қатар коммерциялық нысандарды тиімді орналастыру бойынша қосымша жобалар жүзеге асырылмақ. Бұл жұмыстар қаланың инфрақұрылымын жақсартып, сауда мәдениетін көтеруге септігін тигізеді.
