Бәйдібек ауданына жұмыс сапарымен венгриялық инвесторлар келді. Олардың сапары барысында ауыл шаруашылығы саласындағы жаңа технологияларды енгізу және жергілікті шаруалармен серіктестік орнату мәселелері талқыланды. «East-West Agro» компаниясының Шығыс Еуропа және Азия бойынша аймақтық директоры, ауыл шаруашылығы ғылымдарының докторы Молнар Пал және ауыл шаруашылығы дақылдары бойынша менеджер, агроном Вираг Эрик аудан шаруаларымен кездесті. Бұл кездесуде тараптар ауыл шаруашылығын дамытуға бағытталған бірқатар маңызды мәселелерді қарастырып, тиімді шешімдер ұсынды.
Кездесу барысында венгриялық инвесторлар жоғары сұрыпты дәнді және бұршақты дақылдарды, атап айтқанда құмай мен күнбағыс тұқымдарын өсіру, сондай-ақ агротехнологиялық процесстерді жетілдіру үшін жоғары технологияларды қолдану мүмкіндіктерін талқылады. Бұл ұсыныстар ауданның ауыл шаруашылығында жаңа әрі тиімді әдістерді енгізуге жол ашады. Сонымен қатар, тараптар өндіріс көлемін арттыру үшін әртараптандыруға бағытталған жобалар туралы да ой қозғады.
Сонымен қатар, венгриялық мамандар ауданның топырақ құнарлылығын зерттеп, жер ресурстарының әлеуетін анықтау мақсатында ғылыми-зерттеу жұмыстарын жүргізетінін айтты. Бұл жұмыстар ауданның аграрлық өндірісін жақсарту үшін өте маңызды. Инвесторлар «Асқар тау» шаруа қожалығына арнайы барып, 500 гектар алқапқа орнатылған жаңбырлатып суару қондырғыларымен танысты. Бұл суару жүйесінің тиімділігі мен егіс өнімділігін арттырудағы маңыздылығына ерекше назар аударылды. Мамандар бұл технологияның, әсіресе су ресурстарын үнемдеу мен өнімділікті арттыру тұрғысынан үлкен әлеуетке ие екенін атап өтті.
Сапар аясында делегация аудан орталығындағы №19 кәсіптік колледжге барып, ауыл шаруашылығы мамандарын даярлайтын оқу орнының материалдық-техникалық базасымен танысты. Бұл колледжде ауыл шаруашылығы саласына қажетті мамандарды даярлау бойынша сапалы білім беру мақсатында жаңа бағдарламалар мен курстар енгізіледі. Қос тарап студенттермен тәжірибе алмасу, тағылымдамадан өткізу, сондай-ақ бірлескен ғылыми-зерттеу жобаларын іске асыру мүмкіндіктерін қарастырды. Бұл ынтымақтастық жергілікті білім беру жүйесін жаңғыртуға және ауыл шаруашылығында жаңа технологияларды қолдануға жол ашады.
Жалпы алғанда, венгриялық инвесторлардың Бәйдібек ауданына сапары ауыл шаруашылығы саласындағы жаңа бастамалар мен инновациялық технологияларды енгізуге бағытталған маңызды қадам болып табылады. Мұндай ынтымақтастық жергілікті шаруалар үшін табысты әрі ұзақ мерзімді серіктестіктің негізін қалауға мүмкіндік береді. Бұл жобалар ауданның аграрлық секторын дамытуға, сондай-ақ оның экономикалық әлеуетін арттыруға ықпал ететіні сөзсіз.
