Бүгін, «Түркістан облысы Табиғи ресурстар және табиғат пайдалануды реттеу басқармасының «Созақ орман және жануарлар әлемін қорғау жөніндегі мемлекеттік мекемесі» КММ-нің ұйымдастыруымен Орман шаруашылығы қызметкерлері күніне арналған салтанатты шара өтті.
Іс-шара Созақ аудандық мәдениет үйінде атап өтіліп, оған Созақ аудандық мәслихатының төрағасы Бегімбет Байғараев, «Түркістан облысы кәсіподақтар орталығы» аумақтық кәсіподақтар бірлестігінің төраға орынбасары Айдар Бахтыбаев, «Түркістан облысы бойынша ауыл, орман шаруашылығы табиғат және жануарлар әлемін қорғау қызметкерлерінің кәсіптік одағы» жергілікті қоғамдық бірлестігінің төрағасы Сапарғали Шолданбаев, мекеме басшысы Жүнісхан Әлімбеков, орман саласында ұзақ жыл еңбек еткен ардагерлер мен кәсіподақ активі қатысты.
Салтанатты шарада аумақтық кәсіподақтар бірлестігінің төраға орынбасары Айдар Бахтыбаев сөз алып, орман шаруашылығы қызметкерлерінің ерен еңбегін атап өтті. Ол өз сөзінде қоршаған ортаны қорғаудағы маңызды рөлге тоқталып, осы салада жұмыс істейтін мамандардың табандылығы мен адалдығын ерекше атап өтті. Сонымен қатар, табиғатты сақтау мен дамыту жолында жасалып жатқан жұмыстардың маңыздылығын айта келе, орман шаруашылығын дамыту мен экологияны сақтаудың болашақ ұрпақ үшін қаншалықты маңызды екенін ерекше атап өтіп, барша қатысушыларды кәсіби мерекелерімен құттықтап, жұмыстарына сәттілік тіледі.
Содан кейін сөз алған салалық кәсіподақ төрағасы Сапарғали Шолданбаев сала қызметкерлерін кәсіби мерекелерімен құттықтап, «Облысымыздың орман және жануарлар дүниесін қорғау мен өсімін молайту саласындағы нәтижелі жұмыс атқарып, өңіріміздің дамуына қосқан үлестеріңіз үшін алғысымды білдіремін. Алдағы уақытта да өңірдің табиғи ерекшелігі мен байлығын сақтау жолында сүбелі үлес қосатындарыңызға сенімдімін»- деді.
Жиын ары қарай марапаттаумен жалғасып, онда саланың өсіп өркендеуіне үлес қосып жүрген бірқатар азаматтарға аудандық маслихаттың және облыстық табиғи ресурстар және табиғат пайдалануды реттеу басқармасы басшысының Құрмет грамоталары мен Алғыс хаттары табысталды. Сонымен қатар бірқатар кәсіподақ мүшелері салалық кәсіподақтың «Ардақты ардагер», «Еңбек даңқы» төс белгілерімен және «Құрмет грамотасымен» марапатталды.
Өз кезегінде марапат иелері алған марапаттары үшін алғыстарын айтып, алдағы уақытта да осы бағытта тынымсыз жұмыс істейтіндерін жеткізді.
СОЗАҚ АУДАНЫНДА ОРМАН ШАРУАШЫЛЫҒЫ ҚЫЗМЕТКЕРЛЕРІНІҢ КҮНІ АТАЛЫП ӨТТІ
