Былтырдан бері елде «Amanat» партиясының қолдауымен азаматтардың қаржылық сауатын арттырып, инвестиция, несие, депозит басқа да мәселелер туралы азаматтарға жан-жақты ақпарат беретін «Қарызсыз қоғам» жобасы жүзеге асырылып жатыр.
Осы орайда, Түркістан облысындағы ауылдық округ әкімдерінің қатысуымен «Қарызсыз қоғам» әлеуметтік жобасы аясындағы семинар бүгін Түркістан жоғары көпсалалы аграрлық колледжінің базасында жалғасты. Облыстық қаржы басқармасының үйлестіруімен өтіп жатқан семинар жұмысының екінші легінің ашылу рәсіміне «AMANAT» партиясы Түркістан облыстық филиалының төрағасы, Түркістан облыстық мәслихатындағы партиялық фракцияның жетекшісі Алтынсары Дүйсенбекұлы Үмбетәлиев қатысты, деп хабарлайды «AMANAT» партиясы Түркістан облыстық филиалының баспасөз қызметіне сілтеме жасаған anyqtimes.kz ақпараттық агенттігі.
Халық табысын арттыру – мемлекеттің басты міндеті болып айқындалғаны белгілі. Биліктің барлық тармағы әр азаматтың бақуатты өмір сүруіне барлық жағдай жасауға бағдарланған. Мемлекет басшысы жария етіп, іске асырып жатқан ауқымды саяси-экономикалық, әлеуметтік реформалар түбегейлі өзгерістер әкеліп, халықтың әл-ауқатын жақсартуға қызмет етуі керек деп белгіленген. Осы орайда, үнемшілдік пен прагматизм қағидалары қоғамдық сананың бұлжымас бағдары болып белгіленген.
Табысқа жету жолында билік пен бұқара теңдей қадам басып, егіз қимыл жасауы тиіс деп білеміз. Жауапкершілігі бар қоғам құру, азаматтарды экономиканың базалық біліміне баулу, оларды әлеуметтік ортаға кіріктіру, дәуірдің талабына сай елге қажетті құндылықтар, көзқарастар мен түсініктер қалыптастыру міндеті жаңа қоғамдық этиканы орнықтыруды талап етеді. Партиямыз бастамашыл болған «Қарызсыз қоғам» жобасы – азаматтарымызды несиеге байланып, қарызға өмір сүру көзқарасынан арылтып, отбасылық кірістің қисабын жүргізудің ұтымды әдістеріне үйретеді, оларды қажетсіз шығынға ұрынып қалудан сақтандырады.
Мемлекеттік билік құрылымында халықпен тікелей байланысып, етене жұмыс жүргізетін лауазым иелері – бұл ауыл әкімдері. Халықты жаңа көзқарасқа, ұтымды ұстанымға және берекелі өмір сүру қағидатына баулуда мемлекеттік билік функциясын атқаратын халық қызметшілеріне жүктелер міндет ауқымды. Осы тұрғыдан ойластырылған семинарда ауыл әкімдері қарызсыз қоғам құрудың негізгі миссиясын меңгеріп, ауыл азаматтарын отбасылық табыстың дұрыс есебін жүргізуіне жәрдемшілік қызметін көрсетеді.
«Қарызсыз қоғам» жобасының мәні мен мазмұнын түсіндіріп өткен Алтынсары Дүйсенбекұлы, өзекті әлеуметтік проблемаға айналып отырған мәселеге Мемлекет басшысы Қасым-Жомарт Кемелұлы Тоқаев айрықша назар аударғанын жеткізді. «Осы орайда, «AMANAT» партиясының Төрағасы Ерлан Жақанұлы Қошановтың бастамасымен азаматтардың қаржылық сауаттылығын көтеруді көздейтін «Қарызсыз қоғам» жобасы іске қосылды. Нәтижесінде, өткен 2023 жылы бұл жоба облысымызда сәтті жүзеге асырылып, 14 600-ден астам азамат оқытылды. Ал, биылғы жылдың 4 айында облыста төрт мыңнан астам азамат оқытылды», деді Алтынсары Дүйсенбекұлы.
Айта кету керек, үш күндік семинардың алғашқы легі 13 мамырда Түркістан қаласынан бастау алып, оған Арыс, Отырар, Бәйдібек, Созақ, Сауран, Кентау аумақтарынан 62 ауылдық округ әкімдері қатысты, оқу курсының қорытындысымен арнайы сертификаттарға ие болды. Семинардың екінші легінде Түлкібас, Сайрам, Төлеби, Қазығұрт, Ордабасы аудандарынан 65 ауылдық округтерінің әкімдері қаржылық білімдерін жетілдіруде.
«AMANAT» партиясының Түркістан облыстық филиалы «Қарызсыз қоғам» жобасы аясындағы оқу курстарының бекітілген кесте бойынша өтуін тұрақты бақылауына алған.
Халықтың қаржылық сауатын арттыруға бағытталған бағдарлама өткен жылы пилоттық жоба ретінде басталды. Биыл атқарылған жұмыс сарапқа салынып, жалғасын тауып жатыр.
Былтыр мамыр айында кез келген тұрғынға қаржылық сауатты арттырып, қарыздан құтылуға көмектесетін «Қарызсыз қоғам» жобасы іске қосылған еді. Биыл жоба жаңа тыныс алды және проблемалық борышкерлерді де оңалту бағдарламасы қолға алынды. Осы орайда «Қарызсыз қоғам» жобасының жетекшісі Ақмарал Бекмұрзаева жобаның басты жетістіктері мен бағыттары туралы айтып берді.
115 мың адам қаржылық сауатын арттырды
«Қарызсыз қоғам» жобасында өткен жылы 65 мың адам, биыл 49 мың адам білім алды. Бұл – үлкен көрсеткіш. Қатысушылардың жартысына жуығы білікті қаржы және заң мамандарының көмегін алды. Бұл ретте, шоттың бұғатталуынан бастап, қарызды қайта құрылымдау, соттан тыс банкроттық рәсімдеу, коллекторлармен жұмыс секілді 20 бағытта көмек жүргізілді. Сондай-ақ қаржы сарапшылары бизнес-жоспар жазу, отбасылық бюджетті қолға алуды үйретті. Ең бастысы, жоба қатысушыларының санасы түбегейлі өзгергенін көріп отырмыз. Тығырыққа тіреліп, шығар жол жоқ деп ойлаған борышкерлердің қарызы қайта қаралып, үміт сәулесі пайда болды.
Қаражатты дұрыс жоспарлау, дұрыс басқару тәсілдері болмаса, адам қанша табыс тапса да, жеткізе алмайды. Мәселен, ауылдағы ең табысы жоғары мамандар – мұғалімдер. Олар 300 мың, 400 мың, 500 мың теңге жалақы алса да, несиеден көз ашпайды. Тура осы қаражатты жұмыссыз отырған, көпбалалы аналар бәріне жеткізіп, қарызсыз өмір сүрер едім деп армандайды. Мәселе табыс көлемінде емес, ойлау жүйесінде екенін түсініп, қатысушыларды тұтыну психологиясынан үнемдеу психологиясына бағыттап жатырмыз. Ауыл тұрғындары күнделікті газдалған сусын, чипсы алса, қала тұрғындары – кофе мен десертке ақша жұмсайды. Мұның бәрін үнемдеп, ақшаны тиімді жұмсауға болады.
Әрине, 10 облысты қамтыған су тасқыны жағдайы біздің жұмысымызға да әсер етті. Батыс Қазақстан облысында жағдай қиындап, оқуды тоқтатуға мәжбүр болдық. Қалған аймақтар қалыпты режимде жұмыс істеуде. ТЖ кезеңінде несие борышкерлеріне көмек көрсететін заңгерлер мен қаржы сарапшыларының жұмысын күшейттік. Тіпті, біздің жобаға қатыспағандар да көмекке жүгіне алды. Көбісінің құжаттары жоғалған, қалпына келтіру үшін не істерін білмеді. Біз ЭЦҚ, анықтама, несие шартының көшірмесін алу, тіпті несиені кейінге қалдыру туралы өтініш беруде де жәрдем еттік.
Банктер де қоғамның дамуына мүдделі
Бір жылда біздің жобаны қолдайтын банктер саны да артты. Кез келген банк өз бизнесінің ұзақмерзімді дамуы туралы стратегиялық тұрғыдан ойласа, несиелік қарыздарды уақытында қайтаратын, қаржылық білімі бар, сауатты халық қажет екенін түсінеді. Расында, банктің әлеуметтік жобаларға қатысуы үлкен рөл атқарады. Егер қоғамның қаржылық сауаты өте төмен болса және бұл экономикаға теріс әсер етсе, банктер де мұның қандай ықпал тигізетінін түсінеді. Сондықтан бәрі бір-бірімен тығыз байланысты.
«Қарызсыз қоғам» – елдегі барлық ірі банктерді біріктірген алғашқы жоба. Еліміздің барлық ірі банктері – Freedom Bank, Банк Центр Кредит, Halyk Bank, Altyn Bank, Bereke Bank, Еуразиялық банк, Forte Bank, Home Credit, Jusan, Nurbank, Bank RBK жобаның серіктесі атанды. Президент өз Жолдауында жобаның ауқымын кеңейтуді тапсырған еді. Әзірге Үкімет 2026 жылға дейінгі үш жылға арналған Жол картасын бекітті.
Сондай-ақ «Қарызсыз қоғам» жобасының жалғасы ретінде борышкерлердің табысын арттыру мен проблемалы кредиттерден арылтуды мақсат етіп қойдық. Бұл үшін Жамбыл облысы Меркі ауданында «Агросауат» орталығы пилот ретінде ашылды. Онда адамдар ауылшаруашылық дағдыларын үйреніп, керекті құрал-жабдықтарды алып, нарықта сұранысы бар өнімдер шығарады. Табысының бір бөлігі проблемалық несиені жабуға жұмсалып, өмірлік дағды мен кәсіпті игереді. Жамбылдан кейін халық тығыз орналасқан Түркістан облысы жоспарда тұр. Бұл да банктердің қаржылай қолдауымен іске асқан игі шараға айналды.
Жаңа оқулықта Финляндия әдісі қолданылады
«Қарызсыз қоғам» жобасының құндылығы және оның қисынды аяқталуы – барлық мектептерде, колледждерде және жоғары оқу орындарында қаржылық сауат оқулықтарын әзірлеу болмақ. Бұл оқулықтарды жазарда 543 мың адамға сауалнама жүргізілді және қазіргі «Қаржылық сауат» пәнінің барлық кемшіліктері анықталды. Мысалы, кей мектептерде қаржы саласына қатысы жоқ тарих, қазақ тілі, дене шынықтыру мұғалімдері сабақ береді екен. Оқу материалдары қызық емес. Мұны мектепте жүріп-ақ мобилограф, контентмейкер, СММ болып, табыс табатын оқушылар айтуда. Криптовалютаға, инвестициялық қорлар мен нарықтарға қызығатын ұрпақ өсіп келеді. Соған лайықты ұстаздар мен оқулықтар әлі жоқ.
Сондықтан Оқу-ағарту министрлігімен бірлесіп, оқулық жазатын әдіснамалық топ құрдық. Бұл топ Финляндия мен Эстония тәжірибесін алуға арнайы барып, ынтымақтастық туралы Меморандумға қол қойды. PISA рейтингінде Финляндия мен Эстония қаржылық сауат бойынша әлемде жетекші орын алады. Бұл елдерде бала кезінен ақшаны қалай жұмсау керегі, қауіпсіздік қоры үйретіледі. Біз Қаржы нарығын дамыту агенттігіне 2 мамырды Қаржылық сауат күні деп белгілеу жөнінде өтініш жолдадық. Бұл күні барлық ұйымдарда қаржылық сауаттың не екені айтылса, шеберлік сағаттары, семинарлар мен ашық есік күндері өткізілсе, қаржылық сауатты қоғамға бір қадам жақындаймыз деген ойдамын.
