Келес ауданының Жамбыл ауылдық округі 1994 жылы құрылып, округ құрамындағы елді мекен тұрғындары ау суды тасымалдап тұтынған, деп хабарлайды Azatmedia.kz. Осы орайда 2020 жылы аталған әкімшілік аумағындағы Бекбота, Ащыкөл және Қалғансыр ауылдарының ішкі ауыз су жүйесін жүргізуге жобалық сметалық құжаты дайындалып, сараптамадан өткізілген. Нәтижесінде, Жамбыл ауылдық округі Ащыкөл елді мекенінде тартылатын жалпы құны 438 миллион 658 мың теңге тұратын ауыз су жүйесін жүргізуді «Дәнекер» жауапкершілігі шектеулі серіктестігі жеңіп алған. Қазіргі уақытта 110 миллион теңге қаралып, алғашқы жұмыстар жүргізіліп жатыр.
Сонымен қатар, Қалғансыр елді мекеніндегі ауыз су жүйесін жүргізу құқығын да жоғарыда аталған ЖШС ұтып алған. Сумен жабдықтау нысандарын салу жыл сайын Үкімет бекітетін Бірыңғай нысандар кестесі бойынша жүзеге асырылады. Нысандар құрылысын салу кезінде басымдық берілетін жағдайлар ескеріледі. Сонымен бірге жыл сайын басымдық берілген сумен жабдықтау нысандарының құрылысына республикалық және жергілікті бюджеттерден бөлінетін қаржы қатаң есепке алынып отырады. Жобалау-зерттеу жұмыстары да атқарушы органдар тарапынан қатаң бақылауда болады. Бағдарлама шеңберінде ауыз су сапасын жақсарту үшін тозығы жеткен осы су тарату желілерін жаңарту мәселесі бірінші кезекке қойылып отыр. Осы орайда, жоспарлы шаралар толық іс жүзіне асырылған кезде ауыл тұрғындарын сапалы ауыз сумен қамтамасыз ету мәселесі түбегейлі шешім табатын болады.
