Бұл туралы Орталық коммуникациялар қызметінің баспасөз мәслихатында Түркістан облысының әкімі Нұралхан Көшеров баяндады.
– Мемлекет басшысының су үнемдейтін озық технологияларды жедел енгізу жөніндегі тапсырмасына сәйкес өңірде кешенді шаралар жүзеге асырылуда. Су үнемдеу жүйелерін қолдану ағын суды екі есеге дейін үнемдеп, ауыл шаруашылығы дақылдарының өнімділігін үш есеге дейін арттыруға мүмкіндік береді. Түркістан облысы еліміздегі суармалы жерлердің төрттен біріне иелік етеді. Суармалы алқаптардың жалпы көлемі 554 мың гектарды құрайды. Биыл 27 мың гектарға су үнемдеу технологияларын енгізу жоспарланып, 59 мың гектарға орнатылды. Жоспар артығымен орындалды. Су үнемдеу технологиялары енгізілген жалпы жер көлемі 114 мың гектарға жетті, – деді Түркістан облысының әкімі Нұралхан Көшеров.
Суару технологияларының қолжетімділігін арттыру үшін өңірде алты кәсіпорын ашу қолға алынған. Олардың 4-еуі іске қосылды, алда тағы 2 кәсіпорын ашылады. Нәтижесінде 364 мың гектарға су үнемдеу технологиясымен қамтамасыз ету мүмкін болады. Болашақта бұл кәсіпорындар облысты және көршілес өңірлерді толық қамтамасыз етеді.
Отырар ауданында су үнемдеу технологияларын қолдану арқылы күріш өсіру жобасы жүзеге асырылды. Жоба құны 7 миллион АҚШ долларын құрайды. Тамшылатып суару технологиясын қолдану нәтижесінде өнімділік артып, су екі есе үнемделген.
Облыс аумағында ағын суды жеткізетін ұзындығы 12 731 шақырымды құрайтын 4 180 канал бар. Каналдардың 76 пайызының тозығы жеткен. Осы мәселені шешу мақсатында кешенді жоспар қабылданып, Ислам даму банкінің қаржысы есебінен 302 су нысанын жөндеу көзделген. Бұл жұмыстар аяқталған соң каналдардың тозу деңгейі 50 пайызға дейін төмендейді.
Бұдан бөлек, өңірде жалпы сыйымдылығы 121 миллион текше метр болатын төрт су қоймасын салу жоспарланған. «Бәйдібек ата» және «Қарақуыс» су қоймаларының құрылысы жүргізілуде. «Боралдай» және «Иқан су» қоймаларының жобалары әзірленуде. «Бәйдібек ата» және «Боралдай» су қоймалары іске қосылғанда Түркістан қаласы мен бес аудан тұрақты түрде 113 миллион текше метр сумен қамтамасыз етіледі. Сонымен қатар 16 мың гектарға жуық жердің су қамтамасыз етілуі жақсарып, ауыл шаруашылығы өнімдерінің көлемін жылына 200 миллиард теңгеге дейін арттыруға мүмкіндік туады.
Берілген шаралар су ресурстарын тиімді басқаруға, ауыл шаруашылығының өнімділігін арттыруға және өңірдің су қауіпсіздігін қамтамасыз етуге бағытталған.
Түркістан облысында су ресурстарын тиімді пайдалану мен ауыл шаруашылығын дамыту мақсатында кешенді шаралар қолға алынған. Су үнемдейтін технологиялар мен жаңа суару жүйелерінің енгізілуі су тапшылығын шешуге және өнімділікті арттыруға мүмкіндік береді. Бұл шаралар тек өңірдегі агроөнеркәсіптік кешенді қолдауға ғана емес, сонымен қатар экологиялық тұрақтылықты сақтау мен су ресурстарын үнемді пайдалану бойынша маңызды қадам болып табылады. Алдағы уақытта су үнемдеу технологияларын кеңінен енгізу арқылы ауыл шаруашылығы саласында айтарлықтай жетістіктерге қол жеткізу жоспарлануда. Сонымен қатар, Түркістан облысында су қауіпсіздігін қамтамасыз ету үшін жаңа су қоймаларын салу және каналдар жүйесін жаңарту жұмыстары да жүзеге асырылуда. Бұл жобалар өңірдің суармалы жерлерін тұрақты сумен қамтамасыз етуге, ауыл шаруашылығы өнімдерін арттыруға және жергілікті экономикаға оң әсерін тигізуге бағытталған. Су ресурстарын тиімді басқару – бұл тек бүгінгі күннің ғана емес, болашақта өңірдің аграрлық саласының тұрақты дамуы үшін маңызды фактор болмақ.
