Бұл туралы Орталық коммуникациялар қызметінің баспасөз мәслихатында Түркістан облысының әкімі Нұралхан Көшеров баяндады.
– Мемлекет басшысы білім мен адами капиталды дамыту – экономикалық өсудің негізгі тірегі екенін атап өтті. Бұл бағытта облыста нақты шаралар қабылданып жатыр. Білім беру жүйесінде мектеп тапшылығын шешу мақсатында Президентіміздің бастамасымен «Келешек мектептері» жобасы іске асырылуда. Жоба аясында 23 мың орындық 29 мектеп құрылысы жоспарланған. Оның ішінде 28 мектеп пайдалануға берілді. Қалған 1 мектептің құрылысы жыл соңына дейін аяқталады, – деді Түркістан облысының әкімі Нұралхан Көшеров.
Оған қоса облыста жергілікті бюджеттен 17 мектеп салынуда. Биыл 4 мектеп пайдалануға беріледі, қалғаны келесі жылға өтпелі. Сонымен қатар 41 мектепте реновация жұмыстары жүргізілуде. Қазіргі уақытта 25 мектептің жөндеу жұмыстары толық аяқталды.
Мемлекет басшысы білім беру саласындағы жасанды интеллектіні кеңінен қолдануға назар аударып, IT технологияны дамытуды атап өтті. Осыған орай Оңтүстік Кореямен келіссөз жүргізіліп, нәтижесінде Түркістан қаласында IT мамандарын дайындайтын «Woosong University Kazakhstan» универсеті ашылды. Университеттің жалпы 2 мың студент қабылдауға мүмкіндігі бар. Әкімдік тарапынан 100 грант бөлінді. Бүгінгі таңда, оқу процесі басталып, 108 студент білім алуда. Бұдан бөлек, университетте Оңтүстік Кореядан келген 70 студент тәлім алып, білім беру саласында тәжірибе алмасу жұмыстары жүргізілді.
Президентіміз 2025 жылды «Жұмысшы мамандықтар жылы» деп жариялап, техникалық және кәсіптік білім беру жүйесін түбегейлі жаңғыртуды тапсырды. Облыста 50 колледжде 46 мыңнан астам студент 84 мамандық бойынша білім алуда. Биыл колледжді бітірген 14806 түлектің 79 пайызы жұмыспен қамтылған. Оның 5 мыңға жуығы – жұмысшы мамандық иелері. Жаңа оқу жылына жұмысшы мамандықтарға 9 мыңға жуық грант бөлінді.
Денсаулық сақтау саласында облыс бойынша 219 мекеме халыққа қызмет көрсетеді. Ауылдық жердегі нысандарды жаңғыртуға ерекше назар аударылуда. Биылдың өзінде жергілікті бюджет есебінен 34 жаңа ғимараттың мәселесі шешіледі. 3 аудандық орталық ауруханаға күрделі жөндеу жұмыстары жүргізілуде. Алғашқы медициналық көмек сапасын арттыру мақсатында 60 жедел жәрдем көлігі сатып алынды. Медициналық ұйымдарды материалдық-техникалық жарақтандыру деңгейі 84,7 пайызға жетті.
Түркістан облысында білім беру және денсаулық сақтау саласында жүргізіліп жатқан реформалар аймақтың болашағына айтарлықтай әсер етіп отыр. Мектептер мен колледждердің инфрақұрылымы жаңарған сайын, білім сапасының да артатыны сөзсіз. Бұл ретте, жаңа мектептердің ашылуы мен мектептерді жөндеу жұмыстарынан бөлек, аймақтағы жастарға арналған арнайы оқу орындары мен техникалық мамандықтарға бөлінген гранттардың санының артуы да маңызды қадам болып табылады. Сонымен қатар, мемлекет басшысының адами капиталды дамыту жөніндегі тапсырмалары негізінде, аймақтағы IT саласындағы мамандарды даярлауға ерекше көңіл бөлінуде. Жастардың жаңа технологиялар саласында білім алу мүмкіндіктері кеңейіп, бұл өз кезегінде аймақтың инновациялық дамуына зор ықпалын тигізеді.
Денсаулық сақтау саласындағы жаңашылдықтар мен инфрақұрылымды жақсарту бағытындағы жұмыстары да аймақ тұрғындарының өмір сапасын жақсартуға бағытталған. Әсіресе, ауылдық жерлердегі медициналық нысандардың жаңаруы мен жаңа ғимараттардың салынуы, өңірдегі тұрғындарға сапалы медициналық қызмет көрсетуге мүмкіндік береді. Бұған қоса, жедел жәрдем қызметінің автопаркін жаңарту арқылы медициналық көмекке деген қолжетімділік артты. Бұл жұмыс халықтың денсаулығын сақтау және алдын алу шараларының тиімділігін арттыру үшін өте маңызды. Айта кету керек, білім беру мен денсаулық сақтау салаларындағы жетістіктер Түркістан облысының барлық тұрғынына тікелей әсер етуде. Осы салалардағы жетістіктердің арқасында жастарға жаңа мүмкіндіктер мен білікті мамандарды даярлау жұмыстары қарқынды түрде жүзеге асып, өңірдің әлеуметтік-экономикалық дамуына үлкен үлес қосуда.
