Түркістан облысы Сарапхана ауылының әкімдігі ел азаматтары мен демеушілер есебінен салынған спорт кешенін аукционға салып, сатып жіберді. Жұртты ашындырғаны – әлеуметтік нысан 15 есе арзанға бағаланған. Әрі оны бұл ауылға қатысы жоқ өзге біреулер иемденіп кеткен, деп хабарлайды Azatmedia.kz ақпараттық порталы Qazaqstan телеарнасына сілтеме жасап.
Кешен қазір спорт алаңы емес, мал жайылымына айналған. Футболдың темір қақпасы жерде сұлап жатыр. Көрермендер трибунасы тозған, қоршаулар қирап қалған. Кезінде тап осы кешенді салу үшін Ержан Долдаев 14 миллион теңге қаржы жұмсаған. Бес жыл қатарынан футбол турнирін өткізіп тұрған.
«Жер әкімшілікке қарайды. Мен әкімшілікке сендім. Әкімшілік бізге айтты сен салып бере бер, әкімшілік қарамағында болсын деп. Ақырында мәселе осыған келіп тірелді», – деді спорт кешенін салған демеуші Ержан Долдаев.
Дау биыл басталды. Ержан кешен жанынан бокс және күрес залының құрылысын бастайтын болған. Алайда жер телімі аукционға қойылған. Оған қатысқан ауыл азаматтарына басымдық берілмей, небәрі 1 миллион 150 мың теңгеге өзге біреуге сатылып кете барған.
Кешенді сатуға байланысты құрылған келісім комиссиясының жұмысынан шикілік шықты. Оның құрамында болған екі ауыл азаматының орнына өзге біреулер қол қойып жіберген.
«Жердің өзі 10 миллион, мынадан шыққан ақша 12миллион. Соның бәрін көріп тұрып 1 миллион 25 мыңға сатып жібереді. Демек, мұның артында бір нәрсе бар. Сол үшін аукционда бармақ басты, көз қыстымен сатып жібереді», – деді ауыл тұрғыны Рақымберді Кәленов.
Жергілікті билік спорт кешенінің болашағын емес, нысанды қалайда сатуды көздеді, дейді ашынған жұрт. Өйткені мемлекеттік сатып алу заңы бойынша ауыл әкімінің бір ай ішінде аукцион нәтижелерін теріске шығаруға құқы болғанымен ешқандай әрекет жасамаған. Ол туралы ауыл халқының өтініш арызына да бір айдан бері жауап бермей келеді.
«Бұл жерде не бар екенін білмейміз. Жердің бетінде тұрған шарбақты, кішкентай трибунаны білеміз. Осыларды мамандар шақыртып бағалаттық», – дейді Сарапхана ауыл округінің әкімі Әбілқасым Тұрғараев
Спорт кешенін сатып алғандар оның жұмысын әрі қарай жандандыруы тиіс еді. Алайда меншік иелері арада ай өтпей жатып, жердің 22 миллионға сатылатыны туралы «OLX» сайтына хабарландыру беріп үлгерген.
