Түркістан облысының әкімі Нұралхан Көшеров Сарыағаш ауданына жұмыс сапары барысында былтыр пайдалануға берілген аралас үлгідегі «Ainala» оңалту орталығына барды. Өңір басшысы мекеменің қызметімен танысып, дәрігерлермен және сала мамандарымен пікір алмасты.
Өңір басшысы орталықта ем қабылдап, оңалту және даму процедураларынан өтіп жатқан балалардың жағдайын көрді. Сонымен қатар бүлдіршіндердің өнерін тамашалап, олардың жетістіктеріне оң бағасын берді.
Аталған әлеуметтік нысан «Самұрық-Қазына» АҚ-ның бірыңғай қайырымдылық операторы – «Samruk-Kazyna Trust» қорының қаржыландыруымен және «Baquatty Aimaq Qory» қоғамдық қорымен бірлесіп жүзеге асырылған жоба аясында ашылған.
«Ainala» оңалту орталығының басты ерекшелігі – оның аралас форматта жұмыс істеуі. Бұл әртүрлі диагнозы бар 3 жастан 18 жасқа дейінгі балаларды қамтуға мүмкіндік береді. Орталықта тек медициналық оңалту қызметтері ғана емес, ерте араласу, әлеуметтік бейімдеу және әлеуметтендіру бағытында да кешенді қолдау көрсетіледі.
50 балаға арналған мекеме ерекше қажеттілігі бар балалардың өмір сапасын жақсартуға, олардың әлеуетін ашуға және қоғамға бейімделуіне ықпал етеді.
Сонымен қатар, орталықта балалардың дамуын кешенді түрде қолдауға бағытталған арнайы мамандар тобы жұмыс істейді. Олардың қатарында логопед, психолог, дефектолог және реабилитолог мамандар бар. Әр балаға жеке бағдарлама әзірленіп, оның жағдайына сәйкес оңалту шаралары жүргізіледі.
Мекеменің материалдық-техникалық базасы да заманауи талаптарға сай жабдықталған. Емдік дене шынықтыру залдары, сенсорлық бөлмелер және физиотерапиялық кабинеттер балалардың денсаулығын қалпына келтіруге тиімді жағдай жасайды. Бұл олардың қозғалыс, сөйлеу және әлеуметтік дағдыларын дамытуға мүмкіндік береді.
Орталық қызметкерлері ата-аналармен тығыз байланыс орнатып, балалардың дамуына қатысты тұрақты кеңес беріп отырады. Мұндай қолдау отбасының да психологиялық жағдайын жақсартуға және баланы қоғамға бейімдеу процесін жеңілдетуге ықпал етеді.
Жалпы, «Ainala» оңалту орталығы ерекше қажеттілігі бар балаларға жан-жақты қолдау көрсететін маңызды әлеуметтік жоба ретінде бағаланып отыр. Алдағы уақытта мұндай орталықтардың тәжірибесін кеңейту өңірдегі әлеуметтік қызмет сапасын арттыруға сеп болмақ.
