Қазығұрт ауданында өткен «Сәукеле кию сәндіктен емес — дәстүрден!» тақырыбындағы семинар қазақ халқының байырғы дәстүрлерін қайта жаңғырту мен ұрпақтар сабақтастығын нығайту бағытында маңызды шара болды. Семинарға ардагерлер кеңесі мүшелері, ауыл округтеріндегі «Әжелер алқасы» төрайымдары, жас отбасы мүшелері, «Сымбат» қыздар клубы мен ауыл тұрғындары қатысып, қазақ мәдениетінің аса маңызды бөлшегі — сәукеленің мән-маңызы туралы терең ой қозғады.
Сәукеле кию — сән емес, дәстүр! Сәукеле – тек қалыңдықтың бас киімі ғана емес, ол қазақ қызының бойжетіп, жаңа өмірге қадам басқанын білдіретін киелі белгі. Семинарда «Сәукеле кию сәндіктен емес — дәстүрден» деп атап өтілді. Сәукеле киюдің тек сыртқы көрініс емес, ұлттық құндылықтар мен салт-дәстүрлерді ұстану, ата-баба мұрасына деген құрмет екенін атап өту маңызды болды. Қатысушылар сәукеле арқылы қыздардың өз тегін, салтын, болмысын құрметтеп, рухани байлығын ашатынын ерекше түсіндірді.
Семинардың бірінші бөлімі сахналық қойылыммен басталып, әжелер «Сәукеле кию сәндіктен емес, дәстүрден» тақырыбында көрініс көрсетті. Ал екінші бөлімі қыз ұзату салт-дәстүріндегі өзгерістер мен жаңалықтар туралы сыр-сұхбатпен жалғасты. Сұхбатқа елімізге белгілі ұстаздар мен қоғам қайраткерлері, соның ішінде Ұлағатты Ұстаз Абдулла Т., «Әжелер алқасы» ұйымының төрайымы Ысмайыл Б., «Аналар кеңесі» ұйымының төрайымы Ырсалы П., «Жастар ресурстық орталығы» басшысының орынбасары Абдуллаева М., және Отбасын қолдау орталығының психологы Әкімбай Ұ қатысты. Олар қазіргі қоғамдағы дәстүрлер мен ұлттық құндылықтарды сақтаудың маңыздылығы туралы өз пікірлерін ортаға салды.
Семинар барысында қазақ халқының ең қасиетті салттарының бірі – сәукеле киюдің жастар арасындағы танымын арттыру және оны сәннен емес, дәстүрден сақтап қалудың жолдары қарастырылды. Бұл іс-шараның мақсаты — өскелең ұрпақтың ұлттық мұраны қастерлеп, оны тек сән үшін емес, шынайы өмірде қолдану мәдениетін қалыптастыру. Жастардың қазақ халқының тарихы мен мәдениетіне деген қызығушылығын ояту, олардың дәстүрлер мен ұлттық құндылықтарға деген құрметін арттыру бүгінгі қоғам үшін өте маңызды.
Семинардың маңызы қазіргі жастарға дәстүр мен мәдениет туралы сүбелі ойлар айтылып, болашақ ұрпаққа зор тәрбие беру тұрғысынан ерекше болды. Сонымен қатар, қоғамның рухани жаңғыруына, ұлттық сана мен қазақ мәдениетінің өркендеуіне қосқан үлесі зор болды. Мұндай іс-шаралар тек қоғамның, әсіресе жастардың, рухани дамуында маңызды рөл атқарады.
Семинардың соңында, қатысушылар ұлттық дәстүрлер мен құндылықтарды жастар арасында насихаттау үшін бірлесіп жұмыс істейтіндіктерін білдіріп, болашақта осындай іс-шараларды жиі ұйымдастыруға уағдаласты. Бұл семинардың нәтижесінде әрбір қатысушының бойында ұлттық дәстүрлерге деген құрмет, ұлттық сана мен ұлттық бірегейлікті сақтау қажеттілігі туралы терең түсінік қалыптасты.
Жастарға осы дәстүрлерді ұрпақтан-ұрпаққа жеткізу, өз салт-дәстүрімізді сақтай отырып, заманауи қоғамға бейімделу қажеттілігі туралы айтылды. Сонымен қатар, семинарда «Сәукеле» тақырыбына байланысты арнайы көрме ұйымдастырылып, оған қатысушылар дәстүрлі сәукеленің тарихын, оның әртүрлі өңірлердегі ерекшеліктерін және жасалуы туралы ақпарат алды. Бұл көрме қыздардың дәстүрлі киімдеріне деген қызығушылықтарын арттырып, өз мәдениетіне деген мақтаныш сезімін оятты.
Алдағы уақытта осы бағытта тағы да түрлі кездесулер мен сабақтар өткізу жоспарланып, қазақ халқының рухани құндылықтары мен мәдени мұраларын жастарға жеткізу үшін ауқымды жұмыстар жалғасады.
