Бүгін Қазығұрт аудандық мәдениет сарайында, 23 маусым — Қазақстан Республикасының Мемлекеттік қызметшілер күніне арналған салтанатты мерекелік шара өткізілді. Бұл күн — халықтың игілігі үшін аянбай еңбек етіп жүрген мемлекеттік қызметшілердің кәсіби шеберлігі мен жауапты қызметіне құрмет көрсету күні, сондай-ақ олардың қоғам алдындағы маңызды ролін мойындау мен бағалаудың символы.
Салтанатты жиынға аудан әкімі Азизхан Азимханұлы Исмаилов арнайы қатысып, аудан көлемінде мемлекеттік қызмет саласында табанды еңбек етіп келе жатқан қызметкерлерді төл мерекелерімен құттықтап, өзінің құттықтау сөзінде: “Мемлекеттік қызмет — үлкен жауапкершілікті, жоғары кәсіби біліктілікті, өз ісіне деген адалдық пен халыққа қалтқысыз қызмет етуді талап ететін абыройлы міндет. Ауданымыздың тұрақты дамуы, тұрғындардың әлеуметтік мәселелерінің уақытылы шешілуі және өңірдің өркендеуі — сіздердің күнделікті атқарып отырған еңбектеріңізбен байланысты. Мемлекеттік қызметкердің ең басты ұстанымы — заң талаптарын сақтай отырып, халықтың сенімін ақтау. Сіздердің осы жолдағы қажырлы еңбектеріңізге алғыс айтамын. Еңбектеріңіз табысты, абыройларыңыз асқақ болсын!” — деп атап өтті.
Мерекелік іс-шара барысында аудан әкімдігіне қарасты ауыл округтері, түрлі бөлімдер мен мекемелерде еңбек етіп жүрген бірқатар сала үздіктері мен озат қызметкерлердің еңбегі ерекше атап өтіліп, аудан әкімінің және аудандық мәслихаттың алғыс хаттарымен марапатталды. Марапаттау рәсімі мемлекеттік қызметкерлердің өз ісіне деген адалдықтарын, олардың халыққа қызмет ету жолындағы жанқиярлық еңбектерін көрсететін үлкен бағалау болды. Сондай-ақ, мемлекеттік қызметке жаңадан қабылданған жас мамандар салтанатты түрде ант қабылдады, бұл сәт олардың жаңа қызметтегі адалдығы мен қызметтік жауапкершіліктерін айқындайтын маңызды кезең болды.
Шара соңы концерттік бағдарламаға ұласып, мәдениет үйінің өнерпаздары мерекелік көңіл-күй сыйлады. Олар әсем әндер мен музыкалық нөмірлер арқылы мемлекеттік қызметшілердің күнделікті қажырлы еңбектерін құрметтеп, марапаттады. Мемлекеттік қызметшілер күні — ел дамуының сенімді тірегіне айналған, мемлекет пен халық арасындағы алтын көпір қызметін атқаратын мамандардың кәсібилігін дәріптейтін мерейлі мереке.
Бұл мереке тек мемлекеттік қызметшілердің еңбегін бағалаумен ғана шектелмей, қоғамның әлеуметтік дамуы үшін мемлекеттік қызметтің маңыздылығын тағы да атап өтуге мүмкіндік береді. Қоғам мен мемлекет арасындағы байланыс үзілмей, мемлекеттік қызметшілер әрқашан өз ісіне адал болып, халықтың сенімін ақтауға ұмтылуы тиіс.
