Тамылжыған табиғаты, саф таза ауасы бар тау баурайында орналасқан Төлеби ауданына келуші туристтер саны артып жатыр. Демалушылар табиғат аясында тынығып қана қоймай, жол жиектерін, өзен жағалауларын күл-қоқысқа толтырып, табиғаттың, қоршаған ортаның тазалығын сақтамауда.
Осыған орай аудан әкімі Еркеғали Әлімқұловтың бастамасымен Қасқасу ауылдық округіне қарасты Сайрам су өзенінің жағалауына шұғыл тазалық шарасы ұйымдастырылды. Іс-шараға 200-ге жуық жуық мемлекеттік қызметкер қатысып, 7 шақырым өзен бойы тазаланды. Нәтижесінде, 9 тонна қоқыс жиналып, арнайы техникамен полигонға жеткізілді.
Аудан әкімдігі туристер мен қонақтарды табиғатқа жанашырлықпен қарап, қоқыстарды тастамауға шақырады. Сондай-ақ қоқысты белгіленбеген жерге тастаған азаматтарға ҚР «Әкімшілік құқық бұзушылық туралы»» Кодексінін 505-бабы жене 432-2 бабы бойынша 153 баптарына сәйкес айыппұл салынатынын ескертеді.
