Құрманғазы атындағы Қазақ мемлекеттік академиялық халық аспаптары оркестрі Абай Құнанбайұлының 175 жылдығына орай ұжымдық жиналыс өткізді. Жиынның күн тәртібіне ҚР Президенті Қасым-Жомарт Тоқаевтың «Абай және ХХІ ғасырдағы Қазақстан» мақаласы қойылып, жан-жақты талқыланды.
Жиналысты Құрманғазы атындағы Қазақ мемлекеттік академиялық халық аспаптары оркестрі директорының орынбасары Медет Қуанышев ашып, жүргізді.
«Өздеріңіз білетіндей, атаулы мерейтой Республика деңгейінде аталып өтпек және Құрманғазы оркестрі бұл көштен қалмай жылдың басын Абай Құнанбайұлына арнағалы жатыр. ҚР Президенті Қасым-Жомарт Кемелұлы Тоқаев өзінің «Абай және XXI ғасырдағы Қазақстан» атты мақаласында Абайдың қазақ еліне сіңірген кеңінен тарқата жазып, «Абай мұрасы – біздің ұлт болып бірлесуімізге, ел болып дамуымызға жол ашатын қастерлі құндылық» деп атап өткен болатын», – деді М. Қуанышев.
Сонымен қатар, жиналыста Құрманғазы оркестрінің концерттік менеджері Халес Капезұлы, бас дирижер Абылай Тлепберген және оркестр әртістері Ләйла Мазова мен Мақсат Тлепбергенов те сөз сөйлеп, мемлекет басшысының мақаласы мен Абайдың 175 жылдық мерейтойына қатысты өз пікірлерін білдірді.
Сондай-ақ, Медет Қуанышев бүгінгі күн тәртібіне қойылған мәселеге байланысты жиналысқа қатысушылардың ұсынысын сұрады.
Осы орайда сөз алған Құрманғазы оркестрінің дирижері Жанас Бекентұров Абайдың өлеңдері мен әндерін тек осы мерейтойда айтып қана қоймай, болашақта азық болардай ой түйсігімізге тоқып алуымыз қажет екенін атап өтті.
Жиын соңында Құрманғазы оркестрінің ұжымы бірлесіп Абай Құнанбайұлының «Желсіз түнде жарық ай» әнін орындады.
