«Nur Otan» партиясы жанындағы «Jas Otan» Жастар қанаты Шымкент қалалық филиалының ұйымдастыруымен Айна базары маңында «Кеңес орталығы» консалтинг орталығы іске қосылды.
Шараның мақсаты – жастардың өзекті мәселелерін шешу, ақпараттық сүйемелдеу, тұрғын үй, жұмыспен қамту және тағы басқа мәселе бойынша консультациялық көмек көрсету.
Орталықта базар келушілері мен жұмыскерлері сала мамандарынан тұрғын үй мәселесі, кәсіпкерлік, азаматтарды жұмыспен қамту, заң құқықтары, денсаулық сақтау мәселелері жөнінде тегін консультативті кеңестер мен медициналық көмек, қаладағы бос жұмыс орындары бойынша ақпарат ала алады.
Базардағы көп халық мемлекеттен беріліп жатқан мүмкіндіктерді толық пайдаланбайтындықтан, хабарсыз десек болады. Міне сол мүмкіндіктерден хабар беру үшін, сұрақтарына жауап алу үшін орталық осы базардан ашылып жатыр. Бұдан бөлек «Кеңес орталығының» кеңесшісі күн сайын түрлі сала мамандарын осында шақырып, халыққа құқықтық кеңес беруді ұйымдастырмақ. Айта кететін болсақ, түрлі деңгейдегі мәслихат депутаттары, мекеме басшылары қабылдаулар өткізетін болады. Сонымен қатар, кәсіби заңгер мен психолог маманы консультациялар жүргізеді. Бұл бағдарлама мемлекет беретін мүмкіндіктерді мүлт жібермеуге бағытталып отыр. Ал кейінгі күндері халықпен кері байланыс орнату үшін сауда орталығына прокуратура мен салық басқармасының мамандары шақырылмақ.
Бастама «Nur Otan» партиясы жанындағы «Jas Otan» Жастар қанатының «Jastar Otanga!» партиялық жобасы аясында ұйымдастырылмақ.
