Жамбыл облысының Мойынқұм ауданында кіcі өлтіру оқиғасы болды, деп хабарлайды Azatmedia.kz тілшісі облыстық Полиция департаментінің баспасөз қызметіне сілтеме жасап.
«Мойынқұм аулындағы азық-түлік дүкенінің маңында екі жас жігіт жанжалдасқан. Салдарынан біреyі қайтыс болды. Ауыр қылмыс жасауға не итермелегенін қазір тергеу анықтап жатыр», – деп мәлімдеді баспасөз қызметіндегілер.
Сол маңдағы үйдің тұрғындары атысты естіп, полицияға хабар берген.
«Жедел-тергеу тобының мамандары оқиға орнына келгенде ер адамның денесі жатыр екен. Ол Қылышбай аулының 26 жастағы тұрғыны болып шықты. Бұл дерек бойынша ҚР ҚК-нің 99-бабының 1-бөлігімен сотқа дейінгі тергеу басталды. Сот-медицина сараптамасы тағайындалды», – деді ведомстводағылар.
Тергеу кезінде полиция қызметкерлері Мойынқұм аулының 27 жастағы тұрғынын ұстады. Ол кінәсін мойындады және одан калибрлі қару тәркіленді. Қазір жанжалдың себебі анықталып жатыр. Күдікті уақытша ұстау изоляторына жеткізілді.
