Еуразия жүрегінде орналасқан Елордамызға биыл 22 жыл толып отыр. Қазақстанның Тұңғыш Президентінің идеясымен іргесі қаланған жаңа Елорда осы жылдар ішінде жас мемлекеттің тәуелсіздігінің символына айналды. Ал, Елбасының аты Елордамен қатар аталып, тығыз байланысты болды Себебі, тұңғыш Президент жаңа Астананың болғанын армандады. Бұл жөнінде ол «Жаңа астанаға көшу және оны салу туралы ой менде ертеректе, сонау алыстағы 1992 жылы туған еді. Бірақ, мен ол кезде мұны аузымнан шығармадым, өйткені, Қазақстанның экономикасы ойлағанды іске асыруға мүмкіндік бермеді» деген болатын.
Астананы көшіру идеясының стратегиялық, экономикалық, жалпыұлттық және ұрпақ болашағы үшін маңызды екенін дәлелдей алды. Қорытындысында ол Астананың алғашқы құрылысынан бастап басы-қасында болып, әлем таныған Астанаға айналуына дейін ерен еңбек етті.
Содан бергі өткен 22 жыл ішінде еліміздің бас қаласы – сәні мен салтанаты жарасқан, озық идеяларды, жаңа ғылыми шешімдер мен сәулет өнерінің озық үлгілерімен үйлесім тапқан, дамуы көптің көкейінен шыққан, қуатты, гүлденген шаһарға айналды.
Бүгінде Нұр-Сұлтанда, Қазақстанның барлық өңіріндегі сияқты, жүзден астам ұлт өкілдері өмір сүреді. Халықтар достығы, өзара түсіністік және ынтымақтастық орын алған жерде еліміздің өркендеп өсетіндігі, тыныштығының сақталатындығы жылдар сайын жемісін беріп отыр. Тұңғыш Президенттің де ұстанымы да осы болатын.
Астанамыз Еуропа мен Азияны байланыстыратын тарихи орталық айналды. Әлемнің үздік астанасы болу үшін нақты міндеттер мен мақсаттар қойылған болатын.Бұл күнде осы мақсатқа жету жолында жұмыстар жалғасын тауып келеді.
Бүгінгі Елорда күнімен барша қазақстандықтарды құттықтаймын! Бас қаламыз көркейіп, дами берсін!
Бекайдар Төлегенов,
Шымкент қаласы мәслихатының депутаты, Шымкент қаласы қоғамдық кеңес мүшесі
