Мемлекет басшысы Қасым-Жомарт Тоқаевтың өңірлерге инвестиция тарту, жаңа өндіріс орындарын ашу және экономиканы әртараптандыру жөніндегі тапсырмаларын орындау бағытында Түркістан облысы құрылғаннан бері инвестициялық ахуалды жақсарту бағытында жүйелі жұмыстар атқарылып келеді. Өңір басшысы Нұралхан Көшеровтің бақылауымен инвестициялық жобаларды сүйемелдеу, өндірістік инфрақұрылымды дамыту, кәсіпкерлер мен инвесторларға қолайлы жағдай жасау және инвесторлардың мәселелерін жедел шешу бойынша кешенді шаралар қолға алынған.
Түркістан қаласының рухани және туристік орталық ретінде қарқынды дамуы да өңірге тартылатын инвестиция көлемінің артуына оң әсерін тигізді. Соның нәтижесінде соңғы 8 жылда облыс экономикасына жалпы көлемі 7 трлн 570,8 млрд теңге инвестиция тартылды.
2025 жылдың қорытындысы бойынша негізгі капиталға тартылған инвестициялар көлемі 1 трлн 745,6 млрд теңгені құрап, 2018 жылмен салыстырғанда 4,5 есеге өсті. Ал, 2018 жылы бұл көрсеткіш 314,1 млрд теңгені құраған болатын.
Инвестициялық белсенділік биыл да жоғары қарқынмен жалғасуда. 2026 жылдың алғашқы бес айында өңір экономикасына 614,2 млрд теңге инвестиция бағытталды. Бұл өткен жылдың сәйкес кезеңімен салыстырғанда 150,5 пайыздық өсімді көрсетеді. Өткен жылдың бес айында инвестиция көлемі 387,8 млрд теңге болған.
Сонымен қатар 2025 жылдың қорытындысымен облысқа тартылған тікелей шетелдік инвестициялар көлемі 2 млрд АҚШ долларына жетіп, жоспарланған көрсеткіш артығымен орындалды.
Биыл жалпы құны 369 млрд теңгені құрайтын 67 инвестициялық жобаны іске асыру жоспарланып отыр. Бұл жобалар өндіріс көлемін ұлғайтуға, жаңа жұмыс орындарын ашуға және өңірдің экономикалық әлеуетін арттыруға мүмкіндік береді.
Бүгінде Түркістан облысында инвесторлар үшін қолайлы инвестициялық климат қалыптастырылған. Инвестициялық жобаларды сүйемелдеу, қажетті инфрақұрылыммен қамтамасыз ету, мемлекеттік қолдау шаралары тұрақты түрде жүргізілуде. Оған қоса, негізгі инвестициялық алаңдар бар. Атап айтқанда, «Turan» арнайы экономикалық аймағы, «Орталық Азия» халықаралық өнеркәсіптік кооперация орталығы, индустриялық аймақтар және облыстық барлық аудандары мен қалаларында шағын өндірістік парктер қарастырылған.
Алдағы уақытта да өңір экономикасына инвестиция тарту жұмыстары жалғасып, жаңа өндірістерді іске қосу, экспорт көлемін ұлғайту және халықтың әл-ауқатын арттыру бағытындағы жобаларға басымдық берілетін болады.
Инвестиция көлемінің артуы өңірде өнеркәсіп, ауыл шаруашылығы, туризм, логистика және жаңартылатын энергия көздері сияқты басым салалардың қарқынды дамуына жол ашып отыр. Бұл өз кезегінде экономиканы әртараптандыруға, өңірдің өндірістік әлеуетін күшейтуге және ішкі нарықтағы бәсекеге қабілеттілікті арттыруға ықпал етуде.
Сонымен қатар, инвестициялық жобаларды жүзеге асыру барысында жаңа жұмыс орындарының ашылуына, заманауи технологиялардың енгізілуіне және жергілікті кадрлардың кәсіби біліктілігін арттыруға ерекше көңіл бөлінуде. Мұндай бастамалар халықты тұрақты жұмыспен қамтып қана қоймай, өңірдің әлеуметтік-экономикалық дамуына оң серпін береді.
Өңірде инвесторларға көрсетілетін қолдау шараларын жетілдіру, инженерлік инфрақұрылымды дамыту және әкімшілік рәсімдерді жеңілдету бағытындағы жұмыстар алдағы уақытта да жалғасын табады. Бұл жаңа жобалардың уақытылы іске асуына және инвестициялық тартымдылықтың одан әрі артуына мүмкіндік береді. Жалпы, Түркістан облысында қалыптасқан қолайлы инвестициялық ахуал өңірдің тұрақты экономикалық өсіміне негіз болып отыр. Алдағы кезеңде жаңа өндірістерді іске қосу, экспорттық әлеуетті арттыру және инновациялық жобаларды қолдау арқылы облыстың инвестициялық мүмкіндіктері одан әрі кеңейе түседі деп күтілуде.
