Түркістан облысының әкімі Нұралхан Көшеров Сарыағаш ауданына жұмыс сапары барысында Дарбаза ауылдық округінде орналасқан «Сарыағаш-Құс» ЖШС-нің жұмыртқа өндіретін зауытының жұмысымен танысты. Өңір басшысы кәсіпорынның өндірістік әлеуетін көріп, сала мамандарымен пікір алмасты. Мемлекеттік қолдаулар туралы айтты.
Қазіргі таңда мұнда 20-дан аса адам тұрақты жұмыспен қамтылған. Кәсіпорын басшысы Мұрат Талман өндіріс барысы мен алдағы жоспарлар жөнінде баяндап, өнім сапасын арттыру және өндіріс көлемін ұлғайту бағытында жұмыстар жүргізіліп жатқанын жеткізді. Қазіргі таңда өндірілген өнімдер ішкі нарыққа бағытталған. Түркістан облысы мен Шымкент қаласының нарығына шыққан, сұраныс жоғары.
Облыс басшысы ауыл шаруашылығы мен азық-түлік қауіпсіздігін қамтамасыз етуде мұндай фабрикалардың маңызы зор екенін атап өтіп, өндіріс көлемін арттыру, жаңа жұмыс орындарын ашу және заманауи технологияларды енгізу қажеттігін жеткізді.
Сонымен қатар, өңірде азық-түлік қауіпсіздігін қамтамасыз ету бағытында жергілікті өндірістерді қолдау шаралары жүйелі түрде жалғасып жатқаны айтылды. Осындай кәсіпорындардың дамуы импортқа тәуелділікті азайтып, ішкі нарықты тұрақты өніммен қамтамасыз етуге мүмкіндік береді. Бұл ауыл шаруашылығы саласының бәсекеге қабілеттілігін арттыруда маңызды рөл атқарады.
Кәсіпорын өкілдері өндірісті кеңейту мақсатында қосымша цехтар ашу және құс басын көбейту жоспарлары бар екенін жеткізді. Сонымен қатар, жем-шөп базасын нығайту және өндірістік процестерді автоматтандыру арқылы өнім сапасын жақсарту көзделіп отыр. Бұл өз кезегінде өнімнің өзіндік құнын төмендетіп, нарықтағы қолжетімділігін арттырады.
Сапар барысында сала мамандары ветеринарлық бақылау мен санитарлық талаптардың сақталуына ерекше назар аударудың маңыздылығын да атап өтті. Өнім сапасының тұрақтылығы мен қауіпсіздігін қамтамасыз ету үшін заманауи зертханалық тексеру жүйелерін енгізу қажеттігі айтылды. Жалпы, «Сарыағаш-Құс» секілді өндіріс орындарының дамуы өңірдің агроөнеркәсіптік әлеуетін арттырып, жаңа жұмыс орындарын ашуға және ауылдық жерлердің әлеуметтік-экономикалық дамуына серпін беруге ықпал етеді.
