Түркістан қаласындағы «Достық үйінде» Түркістан облыстық Қазақстан халқы Ассамблеясы жанындағы Аналар кеңесінің бастамасымен «Салауатты сана» жобасы аясында жастармен диалог алаңы ұйымдастырылды.
Іс-шараның басты мақсаты – жастар арасында салауатты өмір салтын насихаттау, нашақорлықтың алдын алу және оның адам денсаулығы мен қоғамға тигізетін кері әсерін түсіндіру.
Кездесуді Түркістан облыстық ҚХА жанындағы Аналар кеңесінің төрайымы Гүлсара Тоққұлова жүргізді.
Диалог алаңында Түркістан облысының қоғамдық даму басқармасы «Қоғамдық келісім» КММ басшысы Эльмира Жанғазиева, Түркістан облысы Полиция департаменті Есірткі қылмысына қарсы іс-қимыл басқармасының аса маңызды істер жөніндегі аға жедел уәкілі, полиция подполковнигі Марат Бимаханов, Түркістан облысының денсаулық сақтау басқармасының «Облыстық психикалық денсаулық орталығы» КММ дәрігері Досхан Шалапов, «Ассамблея жастары» РҚБ Түркістан облыстық өкілдігінің төрағасы Нодиржон Хасантаев баяндама жасады.
Іс-шара барысында қоғамдық келісім мен жастар тәрбиесіндегі маңызды бағыттар қозғалып, есірткі қылмысының алдын алу, заң талаптары мен жауапкершілік түсіндірілді. Сонымен қатар нашақорлықтың адам ағзасына зияны туралы кеңінен айтылып, жастар арасында салауатты өмір салтын қалыптастыру мәселесі талқыланды.
Шара аясында арнайы реалити қойылым арқылы есірткі қылмысының салдары көрсетілді.
Кездесу барысында қатысушылар еркін пікір алмасып, сұрақтарына жауап алды.
Айта кетейік, Аналар кеңесі «Жасыл сертификат» жобасы аясында дәріханаларға мониторинг жүргізіп, тәуелділік тудыратын препараттардың заңсыз сатылуына жол бермеуді көздеп отыр.
Кездесу барысында жастарға нашақорлықтың тек жеке адамға ғана емес, тұтас қоғамға тигізетін зардабы жан-жақты түсіндірілді. Қатысушылар зиянды әдеттердің алдын алуда отбасының, ортаның және білім беру мекемелерінің рөлі ерекше екенін атап өтті. Әсіресе, жасөспірімдердің бос уақытын тиімді ұйымдастыру мен оларды пайдалы істерге бағыттаудың маңызына назар аударылды.
Сонымен қатар, құқық қорғау органдары тарапынан есірткі қылмысына қатысты заң талаптары мен жауапкершілік шаралары кеңінен түсіндірілді. Жастарға заң бұзушылықтың салдары ауыр болатыны, оның болашақ өміріне кері әсер ететіні нақты мысалдар арқылы жеткізілді. Бұл бағыттағы профилактикалық жұмыстарды күшейту қажеттігі де айтылды.
Дәрігер мамандар нашақорлықтың адам денсаулығына тигізетін зиянына тоқталып, оның физикалық және психологиялық тәуелділікке әкелетінін түсіндірді. Сондай-ақ, зиянды әдеттерден аулақ болу үшін салауатты өмір салтын ұстанудың, спортпен айналысудың және дұрыс орта таңдаудың маңыздылығы атап өтілді. Жалпы, мұндай кездесулер жастардың санасын қалыптастырып, зиянды әрекеттерден сақтануға ықпал етеді. Ұйымдастырушылар алдағы уақытта да осы бағыттағы түсіндіру және алдын алу шараларын жалғастырып, қоғамда салауатты өмір салтын кеңінен насихаттауды көздеп отыр.
