AzatMedia. Сайрам демалыс орындарына бай аудан. 1 маусымнан бастап карантиндік санитарлық шектеу талаптарына сай қызмет көрсете алатын «Манкент» шипажайы ашылады.
Шипажайдың санитарлық талапқа қаншалықты сай екенін Сайрам ауданы әкімінің орынбасары Мадияр Оразалиев, кәсіпкерлік бөлімі және аудандық санитарлық қадағалау мекемесінің жауапты қызметкерлері барып көрді.
Бөлмелердегі, ас үй, емдеу жағдайы толығымен шектеу шараларына сай қызмет етуге дайын.
Айта кетейік, «Манкент» шипажайы емделу-демалыс орны Қазақстан ғана емес, ТМД елдерінің тұрғындарының ең сүйікті демалыс және емделу орнына айналған.
Жалпы, 12 гектардан асқан шипажай аумағында бау бақша мен саябақ ішінде 25 тұрғын және қорпустар, балшықпен емдейтін емхана, сұлулық және SPA-салондар, мини-маркеттер, мейрамханалар, кафелер, субұрқақтар, мәдени-ойын орталықтары, балалар және ересектердің ашық бассейндері, жаттығу залы, спорт алаңдары мен тенис корттары бар.
«Манкент» шипажайы медициналық профильді мамандырылған бальнеоклиматтық шипажай.
Мұнда перифириялық нерв пен сүйек-бұлшық еттер жүйелерін, ішкі құрылыс органдары мен тыныс алу жолдарын, урология мен гинекология аурулары, зат алмасуының бұзылуын емдейді.
Шипажайда 23 корпус бар, оның 16-сы-бөлек коттедждер. Қыста шипажай 460, ал жазда 700 адамды қабылдайды.
Әр корпуста 1,2,3 кісілік нөмірлер бар.
Демалушыларды жоғары квалификациялы мамандар қабылдайды.
Шипажайда беретін тағамдардың сапасы мен әр түрлілігіне ерекше назар аударылады. Сонымен қатар, қазіргі заман талабына сай емдек дене шынықтыру кешенінде демалушылар үшін жаттығулар өткізіледі.
Сайрам ауданы əкімінің баспасөз қызметі
