Бүгін «AMANAT» партиясы Түркістан облыстық филиалында АЭС салуды қолдау жөніндегі Түркістан облыстық Халықтық штабының кезекті жиыны өтті. Партияның өңірлік филиалының төрағасы Алтынсары Үмбетәлиевтің жетекшілігімен өткен мәжілісте штаб мүшелерінің облыс тұрғындарымен өткізіп жатқан кездесулерінің барысы таразыланды.Жиын барысында аудан, қалаларда өтіп жатқан кездесулерде өңір тұрғындарының басым бөлігі Қазақстанда атом энергетикасын дамыту идеясына қолдау білдіріп жатқаны айтылды. АЭС салу жөніндегі бастаманы қоғамдастық еліміздің әрі қарайғы дамуына серпін беретін жоба ретінде қарастырылатынына баса мән берілді.«Мемлекет басшысы елімізге сенімді және экологиялық таза қуат көздері аса қажет екенін айтқан болатын. Республикалық Халықтық штабтың ел тұрғындарымен түсіндіру кездесулері Түркістан өңірінен басталғанын білесіздер. Парламент Мәжілісінің және партиямыздың Төрағасы Ерлан Жақанұлы Қошанов тұрақты энергияны өндіруде АЭС-ке балама жоқ екенін айтты және еліміз үшін тағдыршешті мәселеде азаматтық бірлігімізді сақтаудың маңыздылығына тоқталды. Қазақстандықтардың бүгінгі және келешек буындары үшін мәні зор прогрессивті идеяны ілгерілетуде бізге үлкен сенім артылып отыр. Бұл бастаманың стратегиялық маңызынан бастап, экономикалық, экологиялық аспектілерін түгел қамтитындай түсіндіру жұмыстарын жүргізуіміз қажет», – деп атап өтті Алтынсары Дүйсенбекұлы.Жиын барысында, сондай-ақ, облыс тұрғындарымен мақсатты кездесулер өткізудің жоба-жоспарлары талқыланды. Халықпен жүздесулерге сала мамандарын, сарапшыларды, депутаттық корпус өкілдерін, Халықтық штабқа біріккен саяси партиялар мен азаматтық ұйымдардың белсенділерін жұмылдыру мәселесі сараланды. Аудан, қалалардағы штабтар жұмыстарының тиімділігін арттыру, үгіт-түсіндіру шараларынан шалғайда орналасқан ауылдардың қалып кетпеуін үйлестіру, қоғамның барлық әлеуметтік санаттарын түсіндіру жұмыстарымен қамту мәселелері қаралды. Бұл жұмыстардың атқарылуы АЭС салуды қолдау жөніндегі Түркістан облыстық Халықтық штабы тарапынан жүйелі бақыланатын болады.
ТҮСІНДІРУІ ЖАҚСЫ БАСТАМАНЫҢ ҚОЛДАУШЫЛАРЫ КӨП БОЛАДЫ
