Бәйдібек ауданы әкімдігінің мәжіліс залында өңірдегі көпбалалы және алтын құрсақты аналар марапатталды. ҚР Президентінің Жарлығымен марапатқа ие болған 18 ананың 3-і алтын, 15-і күміс алқа иегері. Бұл шараның мақсаты – ана мен баланың қоғамдағы маңызын атап өту, олардың отбасындағы рөлін жоғары бағалау.
Аудан әкімінің орынбасары Нұрпеис Ақбаев шара барысында аналарды құттықтап, олардың еңбегін жоғары бағалады. «Құрметті, алтын құрсақты аналар! Елімізде ана мен баланы қорғауда мемлекет тарапынан түрлі қамқорлықтар жасалынып жатқанын білесіздер. Баланы дүниеге әкеліп, оны өсіріп, елдің азаматы етіп тәрбиелеп отырғандарыңыз үшін шынайы алғысымды білдіремін. Әрқайсыларыңыздың отбасыларыңызға амандық тілеймін», – деді ол.
Бұл шара аналардың қоғамдағы мәртебесін арттырып, көпбалалы отбасыларға көрсетілетін қолдауды арттырудың маңызды бөлігі болып табылады.
