Жуырда Мемлекет басшысы Бала құқықтары жөніндегі уәкіл Динара Зәкиеваны қабылдап, кездесу барысында Президент балалардың құқығын қорғау мәселесі мемлекеттік саясаттың негізгі басымдықтарының бірі екенін атап өткен болатын.
Мемлекет басшысы Түркістанда өткен Ұлттық құрылтайда бала құқығын қорғауға және өскелең ұрпақ тәрбиесіне қатысты бірнеше маңызды мәселе көтергенін еске салып, отбасыларға жан-жақты көмек көрсететін жүйені қалыптастырып, отбасын қолдау орталықтарын ашу, әлеуметтік қолдауды күшейту, заңға балалардың қауіпсіздігі үшін жауапкершілікті қатаңдататын өзгерістер енгізу маңызды екенін айтып өтті.
Осы орайда, Түркістан облысы әкімдігі жанындағы кәмелетке толмағандардың ісі және олардың құқықтарын қорғау жөніндегі комиссиясының кезекті отырысы өтті. Оған Қазақстан Республикасындағы Бала құқықтары жөніндегі уәкіл Динара Закиева, полиция департаментінің, облыстық прокуратура, білім, денсаулық сақтау, әлеуметтік қорғау, ішкі саясат, мәдениет, дін істері, спорт басқармалары басшылары, орынбасарлары, Түркістан облысындағы бала құқығы жөніндегі уәкіл және аудан, қала әкімдерінің орынбасарлары қатысты. Жиынды Түркістан облысы әкімінің орынбасары Бейсен Тәжібаев жүргізіп отырды.
Комиссия отырысында Түркістан облыстық полиция департаменті өкілінің кәмелетке толмағандарға қарсы жасалған құқық бұзушылықтар мен қылмыстар және профилактикалық жұмыстар туралы дерегі баяндалды.
Бірнеше аудан әкімдері орынбасарлары бала құқығын қорғау бағытында атқарылған жұмыстар бойынша есеп берді. Сонымен бірге өңірдегі келеңсіз оқиғалар талқыланып, түрлі мемлекеттік мекемелердің жұмысына сын-ескертпе айтылды. Мұндай жағдай қайталанбауы үшін жұмысты күшейту керектігі қозғалды. Пробациялық бақылау, пробациялық бақылауда жүрген тұрғындарды жұмыспен қамту, балаларға қауіпсіз орта қалыптастыру бағытында ұсыныстар берілді. Суицид, әлімжеттік, балалар құқықын қорғау бойынша мамандар пікірі тыңдалды.
Қазақстан Республикасындағы Бала құқықтары жөніндегі уәкіл Динара Закиева саладағы кемшіліктерге тоқталып, бұл бағытта барлық құзырлы орган, мемлекеттік мекемелер бірлесе әрекет етуі керектігін жеткізді.
– Бала құқығын қорғау, олардың бақытты өмір сүруін қамтамасыз ету – бәріміздің міндетіміз. Әр мемлекеттік мекеме, басшылар, құқық қорғау органдары мен ата-аналар өз міндеттеріне жауапкершілікпен қараулары тиіс, – деді ол.
Түркістан облысында балалар құқығын қорғау, зорлық-зомбылықтың алдын алу мақсатында 2025 жылға дейін 15 ауданда және 2 қалада Отбасын қолдау орталықтарын құру жоспарланып отыр. Отбасы институтын нығайту, білім мекемелерін жаңарту, оқушыларға заман талабына сай жағдай жасау, мектепте бала құқығы бойынша кеңестер беру, қосымша үйрімелерді көбейту бағытында жұмыстар күшейтіледі.
