Түркістан облысы бойынша мемлекеттік тапсырыс алатын жалпы 157 жекеменшік мектеп бар. Аталған білім беру ұйымдары 2024-2025 оқу жылының соңына дейін «Қаржы орталығы» АҚ тарапынан қаржыландырылған.
Жекеменшік мектептерге жүргізілген талдау жұмыстарының нәтижесінде оқушыларды есепке алу мен қаржыландыру бойынша сәйкессіздіктер анықталды. Ұлттық білім беру дерекқорында мемлекет есебінен қаржыландырылатын оқу орнында тіркелген балалардың іс жүзінде басқа мектепте оқитыны белгілі болды. Түйіткілді мәселелерді шешу мақсатында елімізде жекеменшік мектептерді қаржыландыру бойынша жаңа пилоттық жоба іске қосылды. Енді төлемдер ҚР Қаржы министрлігінің «e-Qazyna» ақпараттық жүйесі арқылы жүргізіледі.
Өңірдегі 157 жекеменшік мектеп ҚР Қаржы министрлігінің «Ақпараттық есептеу орталығы» АҚ-ның «e-Qazyna» порталында тиісті құжаттарын жүктеп, келісімшарттар жасалды. Мәліметтер толық тексеріліп, «e-Qazyna» жүйесіне жүктелгеннен кейін көрсетілген қызметтердің орындалу актісі рәсімделіп, Қаржы орталығына жолдануда.
Бүгінде облыстағы 110 мектепке қаржы аударылды. Яғни, 25 мыңнан астам оқушыға және 4 мыңнан астам жекеменшік мектеп қызметкерлеріне ұсынылған құжаттарға сай төлем толық жүргізілді. Қалған жекеменшік мектептердің оқушылардың сабаққа қатысу көрсеткіштері мен олардың басқа білім беру ұйымдарына ауысу фактілері «BilimClass.kz» платформасы арқылы тексеріліп, жыл соңына дейін толық көлемде төленеді.
Қаржыландыру тек нақты оқып жүрген балаларға жүргізіледі. Барлық дерек расталған соң ғана төлемдер рәсімделеді. Ешбір жекеменшік мектеп назардан тыс қалмайды.
ҚР Оқу-ағарту министрлігінің №251 бұйрығына сәйкес, жекеменшік мектептерді қаржыландыру бойынша пилоттық жоба енгізілуде.
Бұл пилоттық жобаның іске қосылуы жекеменшік мектептердегі қаржыландыру жүйесін ашық әрі тиімді етуге бағытталған маңызды қадам болып табылады. Аталған жоба тек қаржыны тиімді бөлу ғана емес, сондай-ақ білім беру жүйесіндегі әділдік пен теңдікті қамтамасыз ету үшін қажет. Бұрынғы жүйедегі сәйкессіздіктер мен мүмкін болатын қаржылық алаяқтықтың алдын алу мақсатында деректердің нақты және шынайы тексерілуі маңызды. Бұл қадамдар өз кезегінде оқу орнындағы оқушылар мен қызметкерлердің құқықтарының сақталуын қамтамасыз етеді.
«e-Qazyna» жүйесі арқылы төлемдердің жүргізілуі жекеменшік мектептерге мемлекеттік қолдаудың ашық әрі түбегейлі түрде жетуін қамтамасыз етеді. Бұл жүйе арқылы қаржылық мәліметтер тексеріліп, жекеменшік мектептер нақты ақпараттарды ұсына алады. Мұндай тәсіл арқылы қателіктер мен манипуляцияларды болдырмауға болады, өйткені тек шынайы деректер ғана негізінде қаржы аударылмақ. Бұл да өз кезегінде білім беру саласындағы сенімділікті арттырып, мектептер мен оқушылар үшін әділ жағдай қалыптастырады.
Ендігі кезекте, жекеменшік мектептер мен оқушылар арасында көрсеткіштер мен қатысу деңгейі тексеріліп, барлық ақпараттың расталуы мен жаңартылуы маңызды. Осылайша, қаңтар айының соңына дейін барлық төлемдер толық көлемде рәсімделіп, өңірдегі білім беру жүйесі барынша жүйеленеді. Жобаның тиімділігіне қарай оның ауқымы кеңейіп, еліміздің басқа облыстарында да іске асуы мүмкін. Бұл бастама еліміздегі білім беру жүйесін барынша теңгерімді әрі әділ етуге бағытталған.
